Ambasadaoro efatra be izao no indray nitsidika ny orinasa Ambatovy Tanandava Toamasina, ny alatsinainy teo, nahitana ny : ambasadaoron’i Korea atsimo SE Atoa Sang-Woo – ambasadaoron’i Norvège SE Atoa Andréas Danevad – ambasadaoron’i Frantsa SE Atoa Christophe Bouchard – ary ny ambasadaoron’i Etazonia SE Atoa Michael Pelletier. Antoka amin’ny fampandrosoana an’i Madagasikara ny orinasa tompon’andraikitra ara-tontolo iainana sy ara-maha-olon’ny mpiasa ary ara-maha-olon’ny toerana iasany tahaka ny orinasa Ambatovy, hoy ny ambasadaoron’i Korea. Raha ahitana orinasa tahaka izao isam-paritra, dia handroso haingana i Madagasikara, satria tahaka izany no nampandrosoa haingana ny firenena Koreana tatsimo, hoy ity ambasadaoron’i Korea ity. Marina hoy ny ambasadaoron’i Korea eto amintsika, fa famatsiam-bola Koreana sy Japoney ary Kanadiana ny orinasa Ambatovy, saingy fiaraha-miasa amin’ny firenena maro no nahafahana nanangana azy tahaka izao. Nomarihan’ny ambasadaoron’i Norvège sy Frantsa ary Etazonia izay isan’ny mpanjifan’ny vokatra ataon’Ambatovy, fa ilaina amin’ny famatsiam-bola goavana tahaka izao ny fiarovana ny famantsiam-bola ataon’ireo mpandraharaha, ny lafin’ny filaminan’ny firenena ara-politika sy ara-tsosialy, ny lafiny lalana samy hafa, ary ny resaky ny samy mahazo tombony. Ankoatra izany nefa, na eo aza ny olana amin’ny vidin’ny nikela eran-tany tsy mety miakatra mihitsy, dia miezaka ny mamokatra nikela sy kobalta hatrany ny orinasa ary miezaka mitazona ny maha-isan’ireo firenena mpamokatra nikela sy kobalta azy eran-tany ny orinasa Ambatovy Tanandava Toamasina, Madagasikara.
Malala Didier