Feno 20 taona katroka ny 17 janoary 2017 teo, ny nijoroan’ny polisy monosipaly teto Antsirabe. Nisy ny fanamarihana ity jaobily faha- 20 taona ity, ny Talata 17 janoary teo. Raha tsiahivina fohy dia io daty io no nijoroan’ity rafitra ity voalohany teo amin’ny kaominina Antsirabe, marihina aza moa fa teto Antsirabe no nitsangana voalohany izany polisy monisipaly izany teto amin’ny Nosy izay vao nanaraka Antananarivo sy Fianarantsoa. Tamin’ny fitantan-Rtoa Voahangy Rakotondrainibe, ben’ny tananan’Antsirabe na i Neny no amantaran’ny maro azy no nitsanganan’ny polisy monisipaly voalohany. Nanaraka fiofanana volana maro, toy ireny polisim-pirenena ireny mihitsy ireo polisy monisipaly tamin’izay fotoana ary bakalorea no mari-pahaizana notakiana nafahana niditra tamin’izany. Taorian’ny fitondran’i Neny no nisedra olona maro ireo polisy monisipaly, nisy fotoana mihitsy aza no efa novana AMM na “Agent Mobile de Municipalité” ny anaran’izy ireo tamin’ny fitondran’ny Arema, saingy niverina ho polisy monisipaly ihany izany taty aoriana.
Mandritra izao fankalazana ny faha- 20 taona izao, dia nambaran’ny ben’ny Tanana Paul Razanakolona fa haverina hanaraka fiofanana indray ny polisy monisipaly ary hanao ny fianianana, misy 42 amin’izao ny polisy monisipaly eto Antsirabe. Maro tamin’ireo trainainy kosa no efa lasa mpiasam-panjakana ambony sy zandary ary polisy.
Andry N.