Samy nivoaka tamin’ny fahanginany avokoa na ny zandary na ny tompon’ilay fiara tsy mataho-dàlana omaly. Ny antony dia mazava loatra fa sarotra ny mifehy ny olona rehefa tezitra ary tsy maintsy nohazavaina ny tena fototry ny olona mba tsy hitatra amin’ny fitsaram-bahoaka. Voalohany ary dia nilaza ny tompon’ny fiara fa efa mpangalatra niverimberina tao an-tokotany feno kamiao ilay ankizilahy. « Efa tratra indray mandeha izy ary navotsotra satria nahavita nandresy lahatra ny laingany, toy ny hoe nisy baolina latsaka tao an-tokotany ka voatery nihanika tamboho izy. Andro vitsy taorian’io anefa dia nisy namaky indray ny fiara sasany ary nisy zavatra very. Voatery nasiana « caméra de surveillance » tao an-toerana mba handinihana izay mitranga. Ny alika rahateo, ireny « dog allemand » ireny, maty nisy nanapoizina. Tao anatin’izay fahamailoana izay no mbola niverina tao ihany ilay ankizy ary vosambotra », raha araka ny fanazavan’ny tompon-trano izay sady tompon’ny fiara. Nasaina nanondro ny namany ilay voasambotra. Nandritra ny fisamborana ireo roa hafa ireo no niseho ny olana, satria noheverina ho mpangala-jaza ilay tao anaty fiara tsara tarehy. Ny zandary indray, taorian’ny korontana niseho rehetra, dia nanamafy fa tsy nisy ny hala-jaza fa feo izay niely sy nohamafisin’ny facebook no nitarika ny olana. Omaly dia nohenoina avokoa ny ray aman-drenin’ireo ankizy telo. Raha ny fanamarinana natao dia isan’ireo zaza sahirana notezaina tetsy amin’ny Akamasoa ireo zaza. Etsy ankilan’izany, nanokafana fanadihadiana koa ny tompon’ny fiara noho fisamborana tsy ara-dalàna (tokony ho asan’ny mpitandro ny filaminana). Nifandimby nohenoina tao amin’ny tobin’ny zandary etsy Ankadilàlana ireo omaly.
D.R
