Sady tezitra ny olona no ontsa raha nahita ny fatin’ity ramatoa efa lehibe, 70 taona. Teo Belanitra-Ilafy no hita ilay razana ary natsipy fotsiny tao anaty rano. Naratra ny lohany, niongotra ny sofiny ary mbola nihoso-drà tamin’ny fotoana nangalàn’ny fianakaviany azy. Fantatry ny olona amin’ny solon’anarana hoe Bebe Vona (avy amin’ny anarana hoe Yvonne) ity ramatoa ity. Ankoatry ny hoe nisy namono izy dia mbola ahian’ny fianakaviana mafy koa ny hoe niharan’ny fanolanana izy. Ny antony dia tsy nisy tako-kenatra teny aminy tamin’ny fotoana nahitàna azy. Naterina teny amin’ny tranom-paty ny razana ary rehefa vita ny taratasy ara-panjakana ahafana miandry sy mandevina azy dia nentin’ny fianakaviany nody teny Ambohitrarahaba, eny no hiandrasana azy mialoha ny fandevenana izay hatao rahampitso. Heverina ho ny harivan’ny asabotsy no nitranga ity vonoan’olona ity. Ny olona izay nandalo teo an-toerana ny marainan’ny alahady no nahita ny faty natsingevan’ny rano ary nampandre ny fianakaviany. Handrasan’ny fianakaviany ny mba handehanan’ny fanadihadiana mizotra any amin’ny fahazoana ireo mpamono olona. Tamin’ny fotoana niandràsana azy nanomboka ny alahady teo dia mbola feno mangana sy mivoaka rà ny faritry ny lohany.
D.R
