Fanao isan-taona araka ny faritra nofidian’ny mpiasan’ny ladoany manerana ny Nosy, ka voafidy tamin’izany ny faritra Atsinanana tamin’izao andiany faha-07 izao nanaovana ny RNS. Raha ny fanazavana dia miisa 22 ny biraon’ny ladoany mandray anjara amin’ity lalao ara-pirahalahin’ny mpiasan’ny ladoany manokana ity, ka niisa 550 farafahakeliny izy ireo tamin’ny lalao rehetra nahitana taranja iraisana sy manokana. Niisa teo amin’ny 07 teo ny lalao natao nandritra izany, ka nahazo amboara sy medaly avokoa ireo namitra sy sangany nandritra ity lalao iraisan’ny samy mpiasan’ny ladoany RNS ity. Raha ny fantatra dia tao Analamanga Parc sy Votovorona no nanaovana ny hetsika farany nokarakarain’ny mpiasan’ny ladoany ity. Nanazavana ny tale jeneralin’ny ladoany fa ny tanjona amin’ny fanaovana fanatanjahan-tena ho an’ny mpiasa ity, dia mba ahatomady ny mpiasa sy hampavitrika azy ireo amin’ny asany. Eo koa ny fampifandraisana ny samy mpiasa satria ny firaisan-kina no hery, ary ny ady atao amin’ny kolikoly izay tena ady goavana ao amin’ny ladoany. Ankilan’izany dia nilaza ny solontenan’ny ben’ny tanana izay nasaina tamin’izao lalao izao, fa tokony hamerina ny « Elite » eo amin’ny sehatry ny lalao baolina kitra eo anivon’ny ladoany izay nampisy ny « Us Douanes » tamin’izany ny tanjona. Ankoatra izany dia tapaka teo anivon’ny fihaonam-be nataon’ireo mpiasan’ny ladoany fa atao any Morondava ny « Rencontre Nationale Sportive » andiany fahavalo ny taona ho avy.
Malala Didier
