Namoaka ny boky mitondra ny lohateny hoe: » L’Extorsion, un fléau qui ne doit pas rester impuni. Le cas de Madagascar », ny voalohan’ny volana aogositra lasa teo, ny bokikely nosoratan’i Riana Raymonde Randrianarisoa na i Riana Raymond no ahalalana azy amin’ny asa fanaovan-gazety eto Madagasikara. Bokikely izay sady ho entina manentana ny olona lasibatra ho sahy mitoroka, no hanampiana ny mpisehatra rehetra miady amin’ny « Extorsion » hampihatra ny lalana, ankilany. Marihina fa tsy ny fanerena olona hanome vola ihany no atao hoe « extorsion » fa misy ihany koa ny endriny samihafa, tahaka ny fanerena olona hiaiky heloka tsy natao, ohatra mandritra ny famotorana. Ohatra amin’izany ny fanerena hahazoana sonia, hanaovana fifanarahana ara-barotra. Miseho amin’ny endriny maro ny « Extorsion ». Voasokajy ho fandikan-dalana faizin’ny fehezan-dalàna famaizana izy io. Tany amin’ny distrikan’i Betroka no nanaovanany fanadihadiana, nandritra ny valo volana, nahafahana nandrafitra ity bokikely ity. Antony, noho ity distrika ity, izay ahitana karazana fandikan-dalana maro, amin’ny maha faritra mena, azy. Fiaraha-miasa amin’ny tetikasa « ResilienceFund », vatsian’ny Global Initiative Against Transnational Organized Crime, fikambanana iraisam-pirenena miady amin’ny karazan-keloka voahomana sy voarindra ( Crimes organisés) any Soisa no nahafahana Namoaka ity vokatra ity. Ho zaraina maimaimpoana ny bokikely, amin’izao voalohany izao. 500 isa no natota voalohany.
Yv Sam
