Nisehoana lozam-pifamoivoizana mahatsiravina indray ny teny amin’ny lalam-pirenena fahefatra PK 338+700, akaikin’ny Kats-em Auberge, any amin’ny fokontan’Ambodimanga/Betsiboka, kaominina Maevatanàna faharoa ny marainan’ny Alakamisy faha 18 Septambra taona 2025 teo, tokony tamin’ny valo ora mahery dimapolo minitra tany ho any. Ny angom-vaovao voaray hatrany no nahalalana fa fiara taksiborosy nasionaly iray avy any Antsiranana hihazo an’Antananarivo ity tra-doza tany amin’ny toerana voalaza etsy aloha ity, vokatry ny fandehanan’ny mpamily mafy sy fivakisana kodiarana iray aoriana, tao anatin’ny fiolanana no nahatonga ny fionganana teto. Vokany: Olona iray no maty tsy tra-drano, ary niisa fito ireo naratra nandritra ny lozam-pifamoivoizana niseho no efa nahazo fitsaboana sahaza eny amin’ny » CHRR Maevatanàna hatrany, » ireto farany. Tonga nijery zava-nitranga teny amin’ny toerana nisehoan’ny loza nalaky ny Zandary no niara-nisalaha tamin’ny fifanampiana hoan’ireo olona tra-doza, sady nanamafy ny fiambenana amin’ny mety hisian’olona mananaraotra mangalatra ny entan’ireo mpandeha fiara taksiborosy. Efa notanana natao famotorana ihany koa ny mpamily, raha nampidirina ambalam-pamonjana kosa ny fiara taksiborosy. Ny Zandary misahana ny fifamoivoizana, ao amin’ny BPR Maevatanàna no mandray an-tanàna ny raharaha hatreto, raha ny fampitam-baovao voaray hatrany.
Ratantely
