Vokatry ny fiakaran’ny rano nandritra ny ora-mikija telo andro nisesy, dia tapaka nanomboka omaly maraina ny lalam-pirenena fahefatra eo anelanelan’ Andranomamy sy Tsaratanàna amin’ny tetezan’ Ambalavondro. Raha ny vaovao voaray , dia tapaka ihany koa ny tetezan’i Kamory. Voatery mandoa vola arivo ariary ny mpandeha vao afaka miampita lakana. Fa « radiers » efatra ao amin’ny distrikan’i Mampikony amin’ny lalam-pirenena fahenina iny no difotry ny rano tanteraka tsy azo aleha, ka anisan’izany ny ao Tanetilava sy Antsangambato. Na ny « transbordement » amin’ny lakana aza mananosarotra, noho ny faherivaikan’ny rano, hoy ny vaovao.
Eric Manitrisa