Avy any Ambanja ary nikasa ny ho any Mahajanga ity taxi-brousse iray ity no voasavan’ny zandary teo amin’ny Belobaka, distrika Mahajanga II, faran’ny herinandro teo. Rehefa nampidinina ireo entana nampiahiahy dia nahitàna ireto rongony maina aman-jatony kilao ireto, nokasaina halefa ao an-drenivohitr’i Boina.
Miasa andro aman’alina ireo zandary, ao anatin’ny Vondron-tobim-pileovana, manao ny fisavàna eny amin’ireo lalam-pirenena miditra ao an-tampon-tanana, indrindra fa amin’izao hetsika entina hiadiana amin’ny fiparitahan’ny zava-mahadomelina izao. Tamin’ireny fisavàna, izay notanterahan’ny zandary misahana ny fifamoivoizana ireny indrindra no nahasakànana fiara fitateram-bahoaka iray avy any Ambanja, teo amin’ny PK 555+300. Tra-tehaka teo araka izany ny rongony maina, efa vonon-kamidy. Natao tao anaty gony miisa dimy feno hatrany an-tendan-keliny izany, hoy ny vaovao, ary nilanja teo amin’ny 150 kilao teo ho eo. Olona roa no nosamborina teo noho eo ary notanana natao famotorana noho izany. Nogiazana kosa ny « entana » ary natao ambalam-pamonjana ilay fiara fitaterana nitondra azy. Mbola mandeha ny fikaroham-baovao sy ny fanadihadiana mahakasika ny fiavian’ireto rongony ireto, hoy hatrany ny vaovao.
m.L
