Faran’ny herinandro nihoson-drà. Olona telo no indray namoy ny ainy, ny sabotsy sy alahady teo tamin’iny làlam-pirenena fahafito iny, vokatry ny lozam-pifamoivoizana. Ankizy ny roa tamin’ireo ary tovolahy 17 taona ny iray. Am-polony kosa ireo naratra mafy vokatr’izany.
Ny sabotsy teo, fiarabe iray no nanitsaka ankizilahy kely tokony ho 12 taona any ho any, teny amin’iny faritra Tanjombato iny. Notetezin’ny kodiarana mihitsy ny lohan’ity zaza ity ary nipotsaka tanteraka ny atidohany. Maty tsy tra-drano vokatr’izay izy. Araka ny filazan’ireo teny an-toerana dia tafiditra tampoka tanaty arabe ity ankizy ity, izay tsy fantatra mazava hatreto na voatosika na handeha hiampita. Malaza amin’ny fahateren’ny làlana sy ny fahabetsahan’ny olona sy mpivarotra rahateo iny faritra iny. Tsy nahafantatra akory ny fisian’io zazalahy io ny mpamilin’ilay fiarabe ka mbola niroso hatrany. Ny zavatra nipoaka mafy tao ambanin’ny kodiarana no nanaitra azy ka nijanony. Efa rà mandriaka sy atidoha nipotsaka anefa no namonto ny arabe. Ary vatana mangatsiaka no nosokirina avy taoambany kodiarana. Mponina eny amin’iny faritra iny ity ankizilahy ity, raha ny filazan’ireo mponina. Efa nentina tany amin’ny tranom-paty moa ny razana. Ary notazonin’ireo mpitandro filaminana kosa ilay mpamily.
Fa omaly maraina tokony ho tamin’ny sivy ora tany ho any, tamin’iny làlam-pirenena mianatsimo iny hatrany, teo amin’ny PK 45, toerana antsoina hoe Amboasary, miala kely an’i Behenjy, taxi-brousse « Sprinter » iray no nifandona tamina 4×4 iray. Vokany olona roa no namoy ny ainy, sivy naratra mafy. Araka ny fampitam-baovao azo avy tamin’ny zandary misahana ny fifamoivoizana any an-toerana, dia olana ara-teknika avy amin’ity fiara avy any Manakara ity no niandohan’ny loza. Nilazaon’ny hisatra mantsy ity fiara mpitatitr’olona ity, kanefa fidinam-be ny làlana. Nikodingidingy fotsiny araka izany ity farany raha niezaka ny hampijanona izany ny mpamily. Hantsana ny avy an-kavanana ary rindrin-tany kosa ny avy atsy an-kavia. Tamin’ity farany no neritreretin’ity mpamily hanajanonana ilay fiara ity. Tamin’izay indrindra anefa no nisy fiara tsy mataho-dalana izay nifanena tamin’izy ireo, nihanika ilay fiakaràna. Tsy azo nialana ny fifandonana. Tsy vitan’izay fa mbola nivadika ary nikorisa tamin’ny arabe ny sisin’ilay taxi-brousse. Potika kosa ny lohan’ilay 4×4. Zazavavy kely iray sivy taona, niampy tovolahy iray 17 taona no namoy ny ainy teo ho no eo, voatsindrin’ilay « sprinter ». Mpandeha valo kosa no naratra mafy. Enina tao anatin’ilay taxi-brousse handeha hitodi-doha ho aty Andrenivohitra ary roa tao anatin’ilay 4×4, izay nahitana zaza enin-taona, izay mbola miady amin’ny fahatesana raha ny fampitam-baovao hatrany. Ireto farany izay efa samy nentina novonjena tetsy amin’ny Hjra avokoa. « Mbola miandry ny fitsaboana ireo naratra izahay, ary ny fikarakarana ireo namoy ny ainy, dia hiroso amin’ny famotorana » hoy ireo mpitandro filaminana. Tompon’andraikitra tanteraka ao anatin’izao loza namoizana ain’olona izao mantsy ny mpamily sy ny mpanampy azy, miaraka amin’ny tompon’ity taxi-brousse ity.
m.L
