“Masina ny Nosy Boraha, ka miboaka ny fahamarinana, mankasitraka”, isan’ireo sora-baventy narantin’ny vahoaka tao Sainte Marie, nitsenana ireo “zanaky ny nosy” avy niatrika ny fiakaran’ilay antontan-taratasin’ady momba ilay vono olona niseho tany an-toerana telo herinandro lasa izay.
Taorian’ny fiakaran’ny raharaha teo anivon’ny tonia mpampanoa lalàna sy ny mpitsara zokiolona mpanao fanadihadiana teo anivon’ny fitsarana ambaratonga voalohany Toamasina mantsy, dia noafahan’ny fitsarana izy efatra mianadahy tafiditra tamin’izao raharaha izao, noho ny voalaza fa “tondro molotra” nahazo azy ireo. “Niady mafy izahay nandritra ny 10 andro niazonana azy ireo teo anivon’ny mpitandro ny filaminana mpanao fanadihadiana, niezaka nitondra ny fahamarinana taty aminay niarovana ireto zanakay, nefa tsy nisy nihaino afa-tsy ny fitsarana ihany”, hoy ireto vahoaka nilaza ny heviny. “Manameloka iny vono olona iny izahay, tsy fomban’ny Sainte-Mariens ny mamono olona tahaka ireny nefa nitranga izy iny, ka maniry ny hahitana ny marina sy nahavanona iny izahay”, hoy hatrany izy ireo namoaka ny fahitany ny raharaha vono olona feno habibiana tao Sainte Marie ny 21 aogositra teo iny.
Isan’ny nitondra ireo olona nitsena ireto “zanaky ny nosy” noafahan’ny fitsarana tamin’ny raharaha famonoana ireo frantsay roa ny solombavambahoaka ao Sainte Marie, Tsivoulagne Maximin, ary teo amin’ny seranan-tsambon’i Barachois no nanomboka ny hetsika, hatrany amin’ny tanàna misy azy ireo.
Malala Didier
