Taorian’ilay savorovoro niteraka fandrobana ny biraon’ny kaomina sy ny tranona zandary tao amin’ny kaominina Ankerana, distrika Tsiroanomandidy, ny alin’ny alarobia teo dia fantatra fa olona valo no nosamborina tany an-toerana. Ka isan’izany ny lohandoham-pisorona nitarika ireto andian’olona ireto nandroba, izay raha ny vaovao azo avy amin’ireo mpanao fanadihadiana dia isan’ireo tompon’andraikitra ambony ao amin’io kaominina ambanivohitra io ihany. Mbola mitohy kosa etsy andanin’izay ny fanadihadiana sy fikarohana ireo mety ho naman’ireto nandroba sy namaky ny biraon’ny kaominina sy tranona zandary tany an-toerana ireto. Raha tsiahivina, dia fiarovana olona izay voarohirohy ho nangalatra bisikleta, nataon’ny filohan’ny dina tany an-toerana no niandohan’ny raharaha. Noraisina ho mpiray tsikombakomba araka izany ity farany ary namoahan’ny fitsaràna didy fampisamborana. Ity farany no tsy zakan’ireo andian’olona notarihan’ity tompon’andraikitra ambony ity ka nahatonga azy ireo hanao ny tsy fanao, ka tonga hatrany amin’ny famakiana biraom-panjakana sy fifofoana aina mpitandro filaminana. Antonta-taratasim-panjakana maro tamin’izany no nodoran’ireto andian’olona ireto, ary fitoeram-bala no very tao amin’ny tranon’ireo zandary. Eo amin’izay resaka izay, dia nitondra fanamarihana ny Kômandin’ny vondro-tobim-pileovana Bongolava, fa tsy nisy basy « kalach » very akory, nandritra io savorovoro io, araka ny hita teto amin’ny lahatsoratra navoakanay omaly, fa « chargeur » -na « kalach » izay nisy bala 30 no tsy hita. Mitondra ny teny fialan-tsiny araka izany izahay ho an’ireo tompon’andraikitra isanisany eo anivon’ny zandarimariam-pirenena, indrindra ny amin’ny olana izay mety ho naterak’izany.
m.L
