Tena lasa mitombina ny filazan’ireo mpitandro filaminana eo anivon’ny fari-dranomasina Indiana , fa tena lasa kihon-dàlana fandefasana sy fanondranan’ny mpanao trafikan-drongony mahery vaika toy ny « héroïne » sy ny « cocaïne » i Madagasikara. Raha ny fahatrarana ireo tovovavy malagasy mitondra izany ao Maurice, dia efa manamarina izany raha ny angom-baovao natao. Satria mantsy izao, dia misy tatsambo miasa amin’ny sambo MSC LUCIA miantsona ao amin’ny seranan-tsambon’i Toamasina tratra nitondra izany karazana rongony mahery vaika « héroïne » izany . Sarotra anefa ny fikaroham-baovao mikasika azy ity, satria izay hakana vaovao dia miezaka ny miala bala amin’ny fanazavana avokoa, ka miovaova ny lanjan’ny rongony mahery vaika azon’ny mpanao gazety. Raha ny zava-misy aloha, dia in-droa nahatratra ity rongony ity ny loadoany malagasy, dia ny alarobia hariva sy ny alakamisy maraina, ka raha ny lanja azo hatreto dia manodidina ny « 5 kg » izany satria mifatra 2,5kg avy ny tratra tamin’ireo tatsambo ireo ny alarobia sy ny alakamisy teo. Ny fadin-tseranana malagasy no misahana ny fanadihadiana ny raharaha, ka tsy fantatra mazava noho ny fanakatonam-baravaran’ny ladoany amin’ny vaovao, na saika hampidirina eto Madagasikara ireto rongony mahery vaika ireo, na saika mbola hoentina amin’ny seranan-tsambo hafa, satria toa hoe tao anaty « cabine » fatorian’ireo tatsambo no nahatrarana azy ireo, ny alarobia hariva sy ny alakamisy maraina teo. Ankoatra izany, dia izao vao mivoaka tsikelikely ny marina momba ilay resaka volamena nisy namoaka an-tsokosoko teo anivon’ny seranam-piaramanidina Ambalamanasy, ny 10 janoary teo, nataon’ity karana iray efa fantatra amin’ny bizina volamena ary mpiara-miasa amina olona ambony amin’ny fitondrana ihany koa. milanja 25kg izany volana nivoaka an-tsokosoko tao Ambalamanasy Toamasina tamin’ny alalan’ny sidina Air Austral ny 10 janoary izany, ary heverina fa tsy sambany izao fanondranana an-tsokosoko volamena malagasy any Maurice avy eo any Dubai izany, satria tsy mba manana ireny « scanner » fisavana entana ireny ny seranam-piaramanidina Ambalamanasy, nefa misy sidina iraisam-pirenena ka misy manararaotra izany. Efa mandeha ny fanadihadian’ny ladoany mikasika ny raharaha ka ho hita eo ny ho tohin’ny raharaha.
Malala Didier