Ny asabotsy teo no nivoaka ny filazàna fikarohana naparitaky ny zandary. Izany dia mahakasika an’i Abasse Chei Mouhamad Chei, fantatra amin’ny solon’anarana Sebasy. Io farany dia tsy iza fa ben’ny tananan’i Soalala. Karohina miaraka aminy koa i Said Sailany, fantatry ny maro amin’ny solon’anarana Lemetisy. Izy indray dia mpikarakara lanonana no asany. Izy roa lahy ireo, raha araka ny filazàna fikarohana navoakan’ny sampan-draharahan’ny zandary izay misahana ny raharaha heloka bevava, dia voarohirohy amin’ny fandrahonana ho faty sy fanàlam-baraka ampahibemaso. Raha tsiahivina dia efa nosazian’ny fitsaràna miady amin’ny kolikoly ity ben’ny tanàna ity vao tsy ela akory izay. Tsy afaka manatontosa asam-panjakana izy alohan’ny desambra 2024 ary koa voasazy handoa onitra dimy tapitrisa ariary. Raha mbola tsy niravona akory izany dia efa misy indray ity ny raharaha mahakasika azy izay sahanin’ny mpanao fanadihadiana heloka bevava. D.R
