Raha mangidy fatratra ny fahoriana ho an’ireo izay namoy zanaka tamin’ny lozam-piarakodia izay nifanesisesy teto an-drenivohitra dia tsy mba toy izany kosa ho an’ny sasany. Zazalahikely menavava iray indray no hita faty teny amin’ny fanariam-pakon’ny faritra Amboditanimena, fokontanin’ny Soavimasoandro ny marainan’ny alahady lasa teo. Vao maraina dia gaga ny mponina manodidina raha nahita sakaosy iray notaritaritin’ny alika eran’ny làlana. “Nisy sakaosy iray nifampisitonan’ny alika niala avy teo amin’ilay fanariam-pako. Ny dian-drà nanaraka an’ilay sakaosy no nanaitra anay hampiantso ny tompon’andraikitra”, hoy ny iray tamin’ireo nanatri-maso. Niantso haingana an’Andriamatoa Rakotozafy Jean Chrysostome moa izy ireo mba hijery akaiky ny zava-misy. Indrisy moa fa efa ny vata-mangatsiakan’ilay zaza tsy manan-tsiny izay efa tsy nisy tànana ila intsony no novantanin’izy ireo. Mba ho fanaronana ny zava-doza tsy hisy hahatsikaritra moa dia nofenoin’ireo nahavanon-doza vary sy toto-kena ny sakaosy nisy ilay zaza. Raha ny fandinihan’ny nanatri-maso dia tsy mponina avy eny velively no nahavanona izao loza mihoam-pampana izao fa mety fiara nandalo vao mangiran-dratsy no nanipy ity sakaosy ity, teny an-toerana. Raha ny fanamarihana azo hatrany moa dia zaza vao teraka mihintsy izy ity satria dia mbola nanaraka azy teny ny tadim-poitrany. Manoloana ny tsy fisian’ny “poste de police” eny an-toerana dia manararaotra hatrany ireo tsy mataho-tody manao ny asa ratsiny, toy ity tranga mampalahelo ity. Ny polisy eo Analamahitsy no tonga nandray an-tànana ny raharaha ka efa misokatra izao ny fanadihadiana. Tokony tamin’ny 9 ora teo ho eo kosa ny BMH no tonga naka ny razana teny an-toerana.
Niony H.
