Hazo lavalava toy tahon-kifafa izy io ary asian’izy ireo siligaoma eo amin’ny lohany. « Bagety majika » hoy ny zandary, fitaovana hafakely indray fentin’ireo tontakely manjono finday mipetrapetraka eny an-tsena tany amin’iny distrikan’Atsimondrano iny. Mazàna dia andro be olona toy ny andro tsena no hanaovan-dry zalahy ny asa ratsiny ary ireo mpivarotra no nataon-dry zareo lasibatra rehefa iny varimbariana iny. Efa maromaro ihany ireo tratra, antony nanaovan’ireo zandary teny an-toerana hetsika manokana mihitsy, entina hanjonoana ihany koa ireo tontakely mpanao « magie » ireto. Nahitam-bokany izany satria ny alarobia teo dia nisy iray tamin’ireo mpangalatra no tratry ny fokonolona teo an-tsenan’Ambodivary, tao Soavina Atsimondrano. Raha ny voalazan’ireo nahasambotra dia mbola hita tany aminy ilay « baguette magique ». Roa lahy izy ireo, hoy ny fanazavana saingy tamin’io fotoana io dia tafaporitsaka teo am-pelatanan’ireo mpisambotra ny iray. Natolotra ny mpitandro filaminana moa ilay iraikalahy voasambotra. Eo an-dalam-pikarohana ny namany kosa ny zandary. Ilay zalahy io dia efa fantatra anarana sy toeram-ponenana, raha ny fampitam-baovao azo hatrany.
m.L
