Fiara iray Mitsibushi an’ny Fiangonana katolika ao Soavina Betafo no nivarina ambony ambany rehefa avy nidona tamin’ny kamiao tamin’iny lalam-pirenena faha-7 (RN7) iny , ny Sabotsy lasa teo tokony ho tamin’ny 5 ora sy sasany teo ho eo. Araka ny loharanom-baovao, handeha hihazo an’Antananarivo ity fiara ity; izay Mompera no nitondra azy no nifanehitra tamin’ity fiarabe ity tanaty fiolahana tao Andalamaty, fokontany Masoandro, kaominina Ampitatafika-Antanifotsy (PK-93). Ity farany izay voalaza araka ny fizahana nataon’ny mpitandro filaminana, fa tsy nanaja ny ankavana-dalàna tokony halehany. Vokany lehilahy iray 20 taona mpadeha tao amin’ilay Mitsubishi no maty tsy tra-drano. Olona dimy kosa, izay mbola mpandeha tao ihany, ka isan’izany ilay Mompera mpamily no naratra mafy. Araka ny fantatra, dia nitsoaka ity kamiao navanon-doza ity, taorian’ny fifandonana ka mbola tsy fantatra marina ny momba azy. Efa eo am-pelatanan’ny zandary moa ny raharaha ankehitriny.
T.M.