Efa voasambotra mora foana saingy nanita-kevitra ny hitsoaka ny iray tamin’ireo dahalo rain-dahiny, voarohirohy tamin’ny resaka halatra omby ireto. Voatery nampiasa basy ireo mpitandro filaminana, rehefa tsy nety nijanona tamin’ny fampitandremana izy. Voatifitra ary maty.
Somary hafakely ny tetik’adin’ireto dahalo roa lahy, avy nangalatra omby tao amin’ny tanànan’Ambohimarina, ao amin’ny kaominina Antanetibe, any amin’iny distrikan’i Soavinandriana Itasy iny. Novonoiny ny omby. Nentiny ny hena. Ary navelany ny taolany. Omaly, nampandre avy hatrany ny zandary tany an-toerana ireo mponina mahakasika ity resaka halatra omby tao an-tanàna ity. Nisy avy hatrany ny fanarahan-dia, nataon’ireo zandary sy ny fokonolona. Ary tsy ela dia nahitam-bokany. Saingy tsy ilay omby very no hita, hoy ny fampitam-baovao fa efa ny taolany sisa. Nanova paik’ady ireto mpanara-dia ary niafara tamin’ny tokantranon’olona, izay efa iarahan’ny rehetra mahalala fa dahalo izany. Olona roa no tao ary nosamborin’ny zandary avy hatrany sy nanaovana fanadihadiana. Mbola nahitana zava-maranitra sy ody gasy isan-karazany moa tao amin’ity tokantrano nahatratrarana azy roa lahy ity.
Niaiky izy ireo fa tena nangalatra ilay omby ary efa nafenin’izy ireo tsy lavitra teo ny hena. Nanararaotra izany anefa ny iray tamin’izy ireo ka nitsoaka. Nanantena fa tsy ho tratra mihitsy manoloana ireto honahona, renirano sy tanimbary tsy taka-basy, saingy todin’ny bala ihany nony farany. « Voatery nitifitra ireo zandary taorian’ny fampijanonana ka nandratra azy ny bala,ka nitarika fahafatesany », hoy ny vaovao. Nifitsaka tsara kosa tetsy andanin’izay ilay namany ary nanaiky mora foana ny hoentina tany amin’ny biraon’ny zandary. Notanana natao andrimaso ity farany ary hatolotra ny Fampanoavana aorian’ny fakana am-bavany azy.
m.L
