Vilany miisa 25, izay miteti-bidy aman’hetsiny maromaro no nangalarin’ity vehivavy ity tao amin’ny tokatrano iray tetsy Avaratsena, Talata Volonondry. Tsy lasa lavitra anefa dia voasambotry ny zandary ity farany. Ny alahady lasa teo, raikitra ny akoralava sy ny antso vonjeo teo amin’ny tanànan’ny koba sy ny saosisy, tetsy Talata Volonondry. Vehivavy iray manodidina ny 34 taona, izay efa malaza ratsy ho mpamaky trano hikoizana teny an-toerana no tra-tehaka ambodiomby, teo am-pangalarana…vilany. Tao amin’ny fivarotana iray tao an-toerana ireto entana nokasain’ity farany ho alaina an-tsokosoko ireto. Ary tra-tehaka teo am-panangonana izany ny anao vavy. Teo noho eo ihany moa dia niantsoana mpitandro filaminana ity mpamaky trano ity ary tsy ela dia voasambotra. Nentina nihazo ny tobin’ny zandary ho amin’ny famotorana azy, niaraka tamin’ireo porofo : ireo entana nosakainy hangalarina. Efa natolotra ny Fampanoavana ny voalohan’ny herinandro teo ihany moa ity vehivavy hikoizana amin’ny famakiana trano ity, ary fantatra fa nadoboka am-ponja vonjimaika etsy Antanimora. Tsy hanavahana lahy sy vavy intsony amin’izao ny fanaovan-dratsy, indrindra moa fa ny asan-jiolahy izay, tato ho ato dia niha-nirongatra izay tsy izy.
m.L
