Tao anatin’ny 20 minitra tany ho any no nanjakan’ireo jiolahy mitondra basy sy sabatra ny tananan’i Tanambao Ambatondrazaka, ny alahady faha-24 septembre 2017 lasa teo .Tamin’ny 12 ora sy fahefany tany ho any ity tokantrano sady mpanao mofo dipaina ity, izay tao amin’ny fokontany Tanambaon ato anatin’ny kaominina Ambatondrazaka renivohitran no nisy nanafika. Notorahan’izy ireo avokoa ny trano manodidina mba tsy hivoaka ny mponina, nanapoaka basy ny jiolahy. Ny mpiasa tao amin’ilay mpanao mofo no notereny hiantso ny patirao tao amin’ny trano teo ampita. Taitra ny patirao naheno ny savoritaka sy ny fifamaliana ka nivoaka vokatry ny antso, kinanjo vao nivoaka dia niantefa teny amin’ny zanany lahy ny balan’ireo jiolahy. Niditra ny trano ireo jiolahy, ka sady nidaroka ny tao an-trano no nanindrona antsy ary nitaky ny vola. Nanambara ny tao fa ao amin’ny patirao eo amin’ny rihana faharoa ny vola, satria trano misy rihana ilay notafihana. Na dia niezaka nampandositra ny vadiny aza ilay tompon’ny trano raha naheno ny kotaba dia nanjakan’ireo jiolahy ny trano sy ny manodidina, fa ny trano nisy ilay patirao no tsy voasokatra fa efa mailo izy ka namoaka ny vadiny hivoaka teo amin’ny varavarankely. Ilay vadiny tafavoaka no nitsoka kiririoka sy niantso vonjy ka izay no nampilefa ireo jiolahy rehefa vory ny vahoaka. Vokany, tsy nisy zavatra very afa-tsy fahitalavitra iray avo lenta. Raha ny asabotsy faha-23 septembre 2017 no nahavaky ny fonjaben’Ambatondrazaka ka nandosiran’ireo gadra gaigilahy 11 ,dia izao fanafihana izao no nitranga teto amin’ny renivohitry ny faritra. Fantatra ihany koa fa fokontany iray tao Ambodimanga sy ny tao Antanifotsy ary ny tao amin’ny « Abattoir » Ambatondrazaka no samy nahitana fanafihana ny alin’ny alahady faha- 25 septembre 2017 teo .Miantso vonjy ny vahoaka amin’ny tsy fandriam-pahalemana, satria misokatra indray ny fitrandrahana vato tsy ara-dalàna amin’izao fotoana izao ary maro ny olona tsy mazava monina sy tonga eto Ambatondrazaka. Mandray andraikitra ny ao amin’ny prefekitiora sy ny mpitandro ny filamainana.
Janus R