Vokatry ny fiaraha-miasan’ny fokonolona sy ny Zandarimariam-pirenena dia sambo iray no tratra nitondra andramena antsokosoko tao Ambinany, fokontany Maroloko kaominina ambanivohitra Soaviny, distrikan’i Tolagnaro; ny zoma 21 martsa 2014 tokony ho tamin’ny 10 ora alina.
Nidina tany an-toerana ireo tomponandraikitra ara-panjakana maro ao amin’ny renivohi-paritra Anosy nahitàna ny lehiben’ny Faritra, ny komandin’ny Vondron-tobim-pileovana (commandant du groupement) ny zandarimariam-pirenena sy ny tomponandraikitra ao amin’ny Rano sy Ala nijery akaiky ny raharaha. Marihina fa sambo miasa ao amin’ny faritra Toliary ity sambo tratra ity izay nikasa ny hitondra an-tsokosoko andramena 385. Tantsambo 5 no notazonina ary atao famotorana.
Ireto andramena nokasaina havoaka ireto dia anisan’ireo 1500 isa izay efa nogiazana volana vitsivitsy lasa izay no izao nisy nikasa hamoaka izao indray.
