Taorian’ny fakana an-keriny nitranga afak’omaly tolakandro, tokony ho tamin’ny efatra ora, tao an-drenivohitry ny Faritra Anosy ; izay nakan’ny jiolahy takalonaina tovovavy iray 16 taona antsoina hoe : Memena, mpianatry ny Ceg ao Amboasary Atsimo, izay nanao « vacances » nivantana tamin’ny havany ao Ampamakiambato, 4 km miala an’i Taolagnaro tampon-tanàna. Rehefa nokarohin’ny mpitandro filaminana fatratra ny nahavanon-doza tamin’ny alàlan’ny finday nampiasain’ny jiolahy niantsoana ny Ray aman-drenin-drazazavavy, dia voasambotra omaly naraina tamin’ny 10 ora, tamina trano iray tao amin’ny Fokontany Amboanato, ny jiolahy iray. Raha ny nambaran’ny fianakaviana nampita ny vaovao, niala « bus » tsy lavitra sekoly tsy miankina iray tao amin’ny Fokontany Ambinanikely ity tovovavy ity no hita farany, raha tokony hamonjy fodiana. « Taorian’izay dia niantso anay Ray aman-drenin’i Memena tamin’ny alàlan’ny finday ny mpaka takalonaina, ary nangataka vola amina miliara ». Raha ny vaovao voaray hatrany, vao sambany no nisy tranga fakana an-keriny toy izao tao Faradofay tampon-tanàna. Efa misokatra moa ny fanadihadiana lalina ataon’ny mpitandro filaminana any an-toerana amin’izao fotoana izao, ka ho hita eo ny tohiny sy ny tena marina mahakasika an’ity raharaha ity.
Eric Manitrisa