# -Toliara. Mpibizina finday maty namono tena. Tovolahy iray 25 taona, mpibizina telefaonina finday mandehandeha no maty namono tena tamin’ny alalan’ny fihinanana poizina famonoana biby, afak’omaly, tany Toliara. Raha ny angom-baovao dia bokan-trosa ity lehilahy. Noho ny henatra dia nisafidy ny nanapitra ny ainy izy. Tsy nisy nanampo ny nanaovany izao famoizam-po izao na ny havany na ireo manodidina sy mpiara-monina eo an-tanàna, satria olona tena matanja-tsaina izy, hoy ny fianakaviany.
# -Ikongo. Olona roa maty voatifitra, 9 hafa naratra mafy, vola 4 tapitrisa ariary nanjavona. Nahery vaika ny fanafihan-jiolahy mitam-basy niseho tao Ambatofotsy, distrikan’Ikongo, ny fiandohan’ity herinandro ity. Efa-dahy nirongo basy nanafika tokantrano iray tany an-toerana. Lasa tamin’izany ny vola efatra tapitrisa ariary, niaraka tamin’ny entana sarobidy maro tao amin’ity tokantrano voatafika ity. Teo am-pitsoahana ireo jiolahy, no raikitra ny fifanjevoana tamin’ny fokonolona teo an-tanàna niezaka nanohitra an’ireo mpandroba. Naharitra teo amin’ny 30 minitra ny fifandonana, ka raim-pianakaviana mbola tanora roa no indray lavon’ny balan’ireo jiolahy, olona sivy hafa kosa naratra mafy. Tafaporitsaka ireo jiolahy niaraka tamin’ny entana, ka mbola karohina hatramin’izao, hoy ny vaovao.
Eric Manitrisa
