#- Ambohidratrimo. Teratany vahiny voadaroka tao an-tranony. Jiolahy telolahy no niditra an-keriny tao amina tokantranona terantany vahiny iray teny Andranoro, Antehiroka ny alin’ny alakamisy lasa teo. Nirongo basy poleta sy zava-maranitra izy ireo. Nodarohan’ireo olon-dratsy ny vody basy teny aminy ilay tompon-trano ka naratra teo amin’ny lohany. Finday iray kosa no lasan’ireto mpanafika tamin’io fotoana io, ary lasa nitsoaka izy ireo. Nentina namonjy toeram-pitsaboana moa ity naratra taorian’izay. Efa nanokatra ny fanadihadiana sy ny fikarohana ireo nahavanon-doza kosa ny zandary avy ao amin’ny Pa Ambohibao.
#- Andramasina. Sefo fokontany notafihan’ny jiolahy. Nirongo zava-maranitra ireo olon-dratsy ary nanao amboletra niditra tao amin’ity sefo fokontany iray tao Fihaonana, ao amin’ny kaominina Fitsinjovana Bakaro. Tsy naratra ny tompon-trano saingy kosa lasan’ireo mpandroba tamin’izany ny enta-madinika mitentina eo amin’ny dimy alina sy iray hetsy ariary teo ho eo, niampy bisikleta roa. Nandositra izy ireo nony vita ny asa ratsiny. Nandray an-tanana ny raharaha moa ireo zandary avy ao Fitsinjovana Bakaro.
Nangonin’i m.L
