# Ambatolampy. Hala-botry saika najifa ny biby fiompy. Ny talata vao mangiran-dratsy no nanafika ny tanàna tao Antakasina ny jiolahy 9 izay mitondra zava-maranitra, lasan’izy ireo tamin’izany ny omby 1, sy kisoa lehibe 1 ary akoho 5. Tsy lasa lavitra anefa dia tratran’ny mpanara-dia ireto dahalo ka voatery nandositra ary tafaverina tamin’ny tompony avokoa ireo biby fiompy very.
# Maevatanana. Fiara roa nifandona 6 naratra. Ny 30 may teo no nisehoana lozam-pifamoivozana teo amin’ny RN4 (PK225+40) tetsy Kamolandy. Fiara taxi-be Mazda Mini-bus sy fiara P 205 no nifandona tao anaty fiolahana. Samy naharatrana olona 3 avokoa ny roa tonta ka nisy ireo nalefa notsaboina tao amin’ny hopitaly Ankazobe fa ny voa mafy kosa no nentina nankaty amin’ny HJRA.
# Amboasary-Sud. Dahalo 1 maty voatifitra. Ny 1 jiona lasa teo no nanafika ny tanànan’i Tranomaro ny dahalo 50 lahy, ka nangalatra omby 75. Zandary avy nanao fisafoana no nifanehitra tamin’izy ireo ka raikitra avy hatrany ny fifandonana. Dahalo 1 no maty vokatr’izany ary tafaverina avokoa ireo omby nokasainy hangalarina.
Nangonin’i Alem
