Nirefodrefotra indray ny basy tao an-drenivohitry ny faritra Atsinanana tao. Fifandonana mahery vaika nisy teo amin’ireo pôlisy avy eo anivon’ny Fip Toamasina sy ny andian-jiolahy mahery vaika, nikasa hanafika mpandraharaha iray tany an-toerana. Raha ny voalaza dia basy vita gasy sy basy kilalao nampiasain’ireto olon-dratsy tamin’io andron’ny zoma io, nentina nifanandrinana tamin’ireo mpitandro filaminana. Tsy nanaiky hatramin’ny farany moa ireto andian’olon-dratsy, hoy hatrany ny vaovao, fa niezaka ny nifampitana hatrany no sady nanao tari-dositra. Vokany : telo no maty voatifitra ary voasambotra ny roa.
Antoandro be nanahary no nisian’ity fifanenjehana narahana fifampitifirana ity tao Toamasina tao. Araka ny vaovao azo dia tonga teny am-poto-tsofin’ireo mpitandro filaminana ny fisiana olona mikonokonona fanafihana, ary mikasa hanafika mpandraharaha. Nidina avy hatrany teny amin’ny toerana voalaza ireo hery vonjy taitran’ny pôlisy ary nanao sahavao manodidina. « Tsikaritr’ireo jiolahy ny fahatongavan’izy ireo ka tsy nisalasala ireto olon-dratsy fa avy hatrany dia nitifitra sy niezaka nandositra » araka ny fampahafantarana azo. Tao anatin’izay no nahalavo ireto telo ireto, nahavoasambotra ny roa ary nahazoana ireo fitaovam-piadiana, basy vita gasy sy zava-maranitra, niaraka tamin’ilay basy kilalao teny am-pelatanan’izy ireo. Nentina natao famotorana moa ireo roa lahy sisa tsy maty ary notanana natao andrimaso, mandra-piandry ny fanolorana azy ireo eo anivon’ny Fampanoavana.
m.L
