Lasa zary fanao ary nisy nahatsikaritra ihany nony farany. Tsy inona izany fa ny fampiasàna ilay saina kely atao anaty fiara mba hampahafantarana fa manam-pahefana ary tokony hamoraina ny fivezivezeny. Ny olana anefa tao Toamasina dia misy manararaotra mametaka izany ny manodidina ireo manam-pahefana na koa ny mpiara-miasa amin’izy ireo. Nisy nahatsikaritra ihany izany ary nanaparitaka tamin’ny tambajotra sosialy. Vao nanomboka ny nanintona ny mason’ny olona izany, nanala ny « cocarde » maika ireo voakasika izay may endim-boanjo. Omaly dia efa hita fa tsy nisy sahy nametraka izany tamin’ny fiarany intsony ireo mpampiasa izany teo aloha. Misy lalàna ny fampiasana ny « cocarde » ary voafaritra mazava ao ny afaka mampiasa izany. Dikany dia azo hanokafana fanadihadiana soa aman-tsara noho ny fisandohana andraikitra na koa noho ny fanararaotam-pahefana ireo izay voaporofo fa tsy ao anatin’ny lisitra afaka mampiasa izany. Soa ihany fa nihetsika ny olona ary tafampita haingana ny hafatra ary nanala izany maika ireo voakasika.
D.R
