Magazay iray mpivarotra kojakoja elektronika sy kojakoja momba ny fiara no nataon’ny telo lahy mitam-basy lasibatra. Ny talata teo, tokony ho tamin’ny sivy ora maraina, dia isan’ireo mpividy tao anatin’io toerana io ny talem-paritry ny polisy any Toamasina. Tsy nitondra mpiambina izy satria toy ny olon-drehetra mba hividy zavatra amin’ny noely ihany, ary ao an-drenivohitr’i Toamasina ihany rahateo no misy an’Anjoma. Tsitapitapitr’izay anefa no niditra tao ireo telo lahy manao saron-tava ary nanambana basy ireo mpividy miisa dimy – tamin’io fotoana io – avy hatrany. Norobaina izay rehetra tany amin’izy ireo. Lasa ny vola, torak’izany ihany koa ny vola tao anaty “caisse” an’ilay toeram-pivarotana. Isan’ny voaroba ny sakaosy an’ny talem-paritra, izay raha araka ny fantatra dia nisy vola sy basy. Raha ny vaovao azo dia manodidina ny 10 tapitrisa ariary teo no lasa tao amin’ilay toeram-pivarotana. Nisy tamin’ireo mpividy no very 3 tapitrisa ariary nandritra ny fandrobana. Rehefa nandeha ny fanadihadiana voalohany dia fantatra fa olona avy any Fenerive-est, nitondra fiara 4X4 ka hividy entana maro tao Toamasina no tena lasibatra. Efa tafiditra tao anaty toeram-pivarotana izy ka ny saoferany nijanona tao anaty fiara no voaambana basy. Nentina an-keriny niditra tao amin’ny magazay io farany. Noterena ihany koa nanome ny lakilen’ny fiara saingy tsy tany aminy izany fa tany amin’ny mpampiasa azy. Mandeha ny fanadihadiana ankehitriny
JC Steve/D.R
