Lehilahy iray sahabo ho 35 taona eo ho eo no tratra ambodiomby nangalatra “cyclo-pousse” ny harivan’ny alahady teo tao amin’ny fokontany Tsimenatse Toliara. Niharan’ny hatezeram-bahoaka avy hatrany ity rangahy gadralava ity, ka naratra mafy noho ny vono sy daroka nihatra taminy, ary saika nanaraka hatramin’ny ain-dehibe raha tsy nisy mpitandro filaminana tonga haingana nandamina ny raharaha. Teo am-panosehana ilay posy bisikileta nivoaka ny tokotany izy no nisy nahatsikaritra. Raikitra ny hazolava ka nisahotaka ny iray tanàna nanenjika an’ ity mpangalatra. Tsy lasa lavitra akory izy dia tra-tehaka niaraka tamin’ilay fitaovam-pitaterana nangalariny. Raikitra avy hatrany ny tabataba sy fitsaram-bahoaka ka nandratra azy. Raha araka ny loharanom-baovao dia vao tamin’ny herinandro nivalona iny ity lehilahy ity no nivoaka ny fonja, noho ny halatra hatrany, nefa dia izao tratra namerin-keloka izao sahady.
Eric Manitrisa