Vehivavy manodidina ny 30 taona, voalaza fa naolana roalahy, no hitan’ny mpandeha sarety hamonjy tsena vao maraim-be nifatotra tongotra aman-tanana nihosim-potaka tao an-tanimbary, afak’omaly tokony ho tamin’ny 5 ora sy sasany, tany Ankililoaka Toliara II. Raha ny loharanom-baovao, dia saika hovonoina mihitsy ity vehivavy iray niharan’ny herisetra ity ; izay tsy fantatra mazava ny anton’izao fikasana hamono izao, satria nalentik’ireo olon-dratsy tao anaty fotaka izy. Na dia tsentsin’ny fotaka aza ny vavany sy ny sofiny, dia mbola afaka niantsoantso vonjy ihany izy, ary nentin’ny olona nahita azy haingana namonjy tobim-pahasalamana avy hatrany.
Eric Manitrisa