Miaina ao anatin’ny fahasahiranana tanteraka ireo mpiasan’ny Faritanin’i Toliara teo aloha izay mbola tsy nandray ny karamany efa ho 35 volana izao. Nambaran’ireo solontenan’ ny mpiasa nitafa tamin’ny mpanao gazety, fa “ tsy misy miraharaha na mihaino mihitsy ny fitarainanay na dia efa maro aza ireo dingana natao amin’ny tokony handoavan’ny fanjakana ny ampahany amin’ny volanay, kanefa tsy nahitam-baliny izany, na dia teo ary efa im-betsaka ihany koa ny fampanantenana nataon’ny mpitondra sy tompon’andraikitra. “
Kivy tanteraka ireo mpiasa bokan-trosa tsy mahaloa hofan-trano, tsy afa-mampiana-janaka intsony, ary tsy afa-mitsabo tena raha marary, sns. Misy amin’ireo zanaky ny mpiasa tsy afa-mianatra intsony, hoy ny loharanom-baovao, no lasa mivaro-tena tsy fidiny hanampiany ny ankohonany noho ny tsy fisiam-bola, satria ny kibo tsy mba lamosina.
Eric Manitrisa
