Tsy kely lalana ary tsy misy tandroka tokoa ny olon-dratsy. Rangahibe iray mananika ny 65 taona miaraka amin’ny vadiny no karohina fatratra ankehitriny. Raha araka ny loharanom-baovao azo dia nisoloky vola vidina trano mitentina 15 tapitrisa ariary izy mivady nitsoaka ireto. Namidin’ ireto mpivady tamina olona iray ny trano nofain’ izy efa am-polo taonany mahery. Nilaza tamin’ilay ramatoa nividy ny trano izy mivady ireto fa hifindra lasy any Fianarantsoa tanindrazana satria efa antitra ka natao varo-boba maika ilay trano vato misy efitra telo. Resy lahatra sy roboka ilay ramatoa nahita an’ ireto mpivady lehibe. Vita ny 3 jiona teo ny fifanarahana ara-barotra ary naloa tolo-botsotra ny vola rehetra. Gaga anefa ny tena tompon-trano izay mipetraka aty Antananarivo raha tonga tao Toliara, ny alarobia teo, handeha hamonjy fahoriana any Ankililoaka ny ampitson’io, nahita olon-kafa manavao sy manamboatra ary manitatra ny tranony. Kentsona tsy nahateny ity raim-pianakaviana ity raha nandre fa efa lafon’ izy mivady mpanofa izay natokisany ary nentiny toy ny ray aman-dreniny ny trano.
Eric Manitrisa
