Rongony avy any amin’iny faritra Tsinjoarivo iny no voalaza fa haparitak’ity lehilahy iray voasambotry ny pôlisy tetsy Ilanivato ity, ny herinandro teo, eto an-dRenivohitra. Nisesisesy tokoa tato ho ato izay ny fisamborana ireo fanetriben’ny firenena, mpivarotra na mpibizina rongony voasambotr’ireo mpitandro filaminana, na tany amin’ny faritra na ny teto an-dRenivohitra. Taorian’ilay hetsika nataon’ny polisy teny amin’iny faritra Antaninarenina iny tokoa ka nahasamborana ireo olona mpanaparitaka rongony mahery vaika, dia mbola nitohy ihany izay ezaka, ady atao amin’ny fiparitahan’ny zava-mahadomelina izay. Lehilahy iray, manodidina ny 55 taona indray mantsy no voasambotry ny pôlisy ihany koa, teny amin’iny faritra Ilanivato iny. Efa fantatry ny rehetra sy rain-dahiny amin’ny fivarotana rongony ity lehilahy ity. Tonga teny am-poto-tsofin’ny mpitandro filaminana izany ka nidina ifotony teny izy ireo. Natao ny vela-pandrika tamin’ny alàlan’ireo pôlisy manao fanamiana sivily, ka tra-tehaka teo ny lehilahy. Tamin’ny fanadihadiana natao no nahafantarana, hoy ny fampitam-baovao avy amin’ny pôlisy fa ny alatsinainy lasa teo izy no tonga teto an-dRenivohitra, nitondra ireo rongony iray “sachet”. Novidiny telo alina ariary tany Tsinjoarivo ny «entana » ary nokasaina hamidy dimy arivo sy dimy alina ariary teto.
m.L