Tovovavy mpianatra 40 isa no tratran’ny ambalavelona tany amin’ny distrikan’i Tsaratanàna, ka voatery nakatona tsy fidiny nanomboka ny alatsinainy teo ny sekoly rehetra miankina na tsy miankina amin’ny fanjakana any an-toerana, ary tsy nianatra ireo mpianatra fa nahazo « vakansy Ambalavelona », mba hahafahana mitsabo an’ ireo marary. Miteny ratsy sy miantso anaran’olona foana ary mahery fihetsika ireo tratran’ ity aretina mampihoron-koditra ity. Araka ny tati-baovao voaray, dia voalaza fa nisy mpitondra fivavahana Sekta iray, izay tsy niera akory tamin’ny tompon’andraikitry ny sekoly tao amin’ny CEG Tsararova, no tra-tehaky ny mpiambina nandraraka ranom-panafody ody gasy mahery vao maraim-be, ka nanomboka teo dia nirongatra sy niparitaka ny ambalavelona, ary ireo ankizy vavy no tena voany. Raha ny fanadihadiana natao, dia amin’ny fotoan’ny maitso ahitra toy izao hatrany no tena isehoan’ ity aretin-devoly hafahafa ity eto amintsika.
Eric Manitrisa