Tsy mikely soroka amin’ny asa fampandriana fahalemana ny tany sy ny fikarohana ireo olon-dratsy mampitondra faisana ny vahoaka ny Zandary, ato anatin’ny vondron-tobim-pileovana Betsiboka. Raha tsiahivana tokoa ny zava-nitranga, dia ny faha-15 hifoha 16 oktobra taona 2024 lasa teo iny, tokony tamin’ny folo ora alina no nisehoana fanafihan-dahalo mitam-piadiana toy ny basim-borona sy zava-maranitra ny fianakaviany nitoby tany an-tanimbary, iray kilaometatra andrefan’ny tanànan’Ambodiadabo, fokontany Bemakamba, kaominina ambanivohitra Bekapaika, any amin’iny disitrikan’i Tsaratanàna, ato anatin’ny faritra Betsiboka. Tamin’izay indrindra novonoin’ireo dahalo tamin’ny fomba feno habibiana ny raim-pianakaviana iray tokony 61 taona, raha tafaporitsaka nitsoaka ny vadiny, nandritra ny zava-niseho, ka nampandre ny fokon’olona tany an-tanàna. Nafatotra, notofirina, sady noratraina, ilay raim-pianakaviana tamin’izany. Taorian’izay no nanao ny asany ny Zandary, ary fantatra fa ao Antanimbaribe, fokontany Bemakamba, kaominina Bekapaika, disitrikan’i Tsaratanàna ny roa tamin’ireo dahalo ny faha-30 oktobra taona 2024, ka izao Voasambotra izao ny iray. Misokatra ny fanadihadiana, ary mitohy tsy misy hatak’andro ny fikarohana an’ireo malaso sasany.
Ratantely
