Tamin’ny talata lasa teo dia sahotaka tany an-toerana. Tao amin’ny fokontany antsoina hoe Tsiazonaloka, Kaominina Maevatanàna faharoa, no nisehoan’ity fanafihana ity. Tokony ho tamin’ny 5 ora sy sasany hariva no tonga tao ny jiolahy miisa valolahy. Nitondra basim-borona ary tena nampiasainy nandritra ny fanafihana. Omby efatra no lasan’izy ireo, ary nisy vehivavy enina, iray bevoka, nalainy natao takalonaina. Ny olona moa tsy nisy sahy nanohitra satria misy basy teny amin’ireo olon-dratsy ary tena nitifitra rahateo izy ireo. Tsy nisy naratra ny olona tany an-toerana nandritra ny fanafihana nataon’ireo malaso ireo. Efa ho 50 km miala ny tanàna no navotsotry ny dahalo ihany ilay renim-pianakaviana enina natao takalonaina, ny Alarobia teo. Mirongatra tanteraka ny asan-dahalo ao an-toerana raha ny fanazava voarainay. Efa fanindroany no tonga nanafika tao ireo dahalo, tao anatin’ny iray volana monja. Raha ny fangatahan’ny mponina any an-toerana, dia mety kokoa amin’izy ireo raha ny miaramila DAS no haverina any mba hiverenan’ny fandriam-pahalemana.
Ratantely