Ny 8 avril tolok’andro teo no nisehoan’izany, tao amin’ny tanàna antsoina hoe Morafeno notafihan’ireto dahalo telo lahy mirongo basim-borona avy hatrany teny an-tanety ireto omby miraoka vilona.Tsy nahatohitra ireto tompon’omby fa be noho vitsy, ka dia aleo nilavo lefona sady tanam-polo rahateo manoloana ny basy. Omby telopolo no lasibatra tamin’izany ary mbola nalain’ireto mpangalatra ihany koa ny mpiandry omby iray hatao takalonaina.
Tsy tana fa tafaporitsaka anefa ity saika halaina takalonaina, ka iny no nampandre ny tany an-tanàna fa lasan’ny dahalo daholo ny omby teny an-tsaha . Raha vao naheno izany kosa ny tao an-tanàna dia nirongatra nanenjika ireo dahalo, tsy lasa kilaometatra maromaro dia tratra ny iray tamin’ireto dahalo ka dia tratran’ny fitsaram-bahoaka, maty vokatry ny daroka nahazo azy ity dahalo iray , fa ireo namany kosa mbola karohin’ny manampahefana any an-toerana amin’izao.
ALEM
