Tsiroanomandidy : Tambajotra mpangalatra taolam-paty ravan’ny zandary

Dimy lahy izy ireo, ary voalaza fa efa matihanina tanteraka amin’ny resaka vaky fasana, halatra sy varotra taolam-paty. Ny alarobia teo no voapaingotry ny zandary izy ireo teo Ampizarantany, kaominina Tsinjoarivo Imanga, distrikan’i Tsiroanomandidy, niaraka tamin’ny « entana » Tamin’io andro io no nahazo fampandrenesana ny zandary mahakasika ny fisiana olona hafahafa, efa-dahy milonjehitra gony, teo amin’izany tanàna izany. Tanàna izay manamorona iny lalam-pirenena voalohany iny, eo amin’ny kilaometatra vitsy tsy ahatongavana an’i Tsiroanomandidy. Ny tena nampihoronkoditra ny olona dia nilaza izy efa-dahy ireto fa mitady olona hividy « taolam-paty ». Nidina nijery ifotony ny zava-nisy avy hatrany ny zandary ary nametraka paikady hisamborana ireto olona ireto. Nisy fotoana tokoa mantsy, iray volana lasa izay, nirongotra izay tsy izy, araka ny fampitam-baovao azo ny resaka vaky fasana, izay nitranga tamin’ny toerana samihafa tany amin’iny distrika iny. Nony tonga teny an-toerana ireo mpitandro filaminana dia mbola indreo tokoa ireo efa-dahy voatondro mbola nijanona teo amin’ny tetezan’Imanga, niaraka tamin’ny gony. Nosakanana avy hatrany izy ireo ary natao ny fisavàna. Indreo eo, taolam-paty maromaro, saika taolan-dava avokoa, tao an’ilay gony. Nosamborina avy hatrany izy ireo ary nentina natao famotorana. Fantatra hoy ny vaovao fa iraka ry zalahy, ary nisy tompony ny entana. Fantatra soa aman-tsara io tompony io : olona avy ao Ankadinondry Sakay, ka nojokoina moramora tany an-toerana ary voasambotra soa aman-tsara. « Nilaza ireto voasambotra ireto fa efa roa taona no nikirakirana taolambalo an-tsokosoko, izany hoe matihanina tanteraka, soa ihany fa  izao tratra izao. Nambaran-dry zalahy koa fa taolam-paty avy amin’ny fasana ao Ambalahazo, fokontany Bonara, Ankadinondry no nangalariny » araka ny vaovao. Mbola ao anatin’ny famotorana lalina mahakasika ity raharaha ity ny zandary moa amin’izao fotoana io. Nanambara izy ireo fa tsy ireto dimy lahy ireto ihany no ao ambadik’ity halatra taolam-paty sy famakiana fasana ity fa mbola misy naman’izy ireo miriaria any. « Efa fantatra anarana izy ireo ary efa an-dalana ny fikarohana azy ».

m.L