Nalaza teo aloha teo ary hatramin’izao ny hoe ireo fanafody nentim-paharazana eto amintsika dia ampy sy ahafahana mitsabo ary misoroka ny aretina Covid-19. Nisy mihitsy aza andian’olona nilaza ho mpitsabo nentim-paharazana, namantsimpatsika izany. Tena zava-misy sa tsaho fotsiny ihany?
Nitondra fanazavana mahakasika izay ny Filohan’ny Fikambanam-pirenenan’ny mpitsabo nentim-paharazana eto Madagasikara (FMNPM / ANTM), Atoa Andriandrainarivo Josephin. « Filazàna lainga na « déclaration mensongère » ho azo hisokajiana an’izay » hoy izy. « Ny mpitsabo nentim-paharazana dia tsy manao fitiliana amin’ny fitaovana « moderne » ahafahana milaza fa tena hoe Covid-19 no mahazo ilay olona. Ny tranga miseho ety ivelany, toy ny hoe ny « allergie » no azon’izy ireo tsaboina. Fa raha hoe handeha hanasitrana ny Covid-19 izy ireny dia tsy misy izany. Averinay foana fa tsy afaka manao fitiliana na mampiasa fitaovana medikaly ny mpitsabo nentim-paharazana, izay hany tokana hahafahana mamantatra ity aretim-baovao avy any ivelany ity ». Nanisy teny ihany koa izy, mahakasika an’ireo fanafody « gasy » voalaza fa fiarovana na fisorohana ity aretina ity. « Tsy misy fanafody nentim-paharazana manokana mitovy lenta amin’ny vaksiny akory, ka afaka hisorohana izany aretina izany. Mbola lazaiko ampahibemaso fa lainga izay mpitsabo milaza fa manana izany. Izahay anie ka miara-miasa amin’ny Ministera, manentana ny olona hanao vaksiny. Araka ny teny filamatra miranty ao amin’ny birao-nay hoe ny fombandrazako no hampiasàko ny voajanahary, hampifamenoana amin’ny vaksiny, hamongorana ny Covid-19 ».
Marihana fa mbola misy ary tsy mbola lefy akory ity valan’aretina ity eto amintsika. Araka ny antontan’isa navoakan’ny Ministeran’ny fahasalam-bahoaka dia nisy iray namoy ny vokatr’izay aretina Covid-19 izay ny herinandro teo, raha 24 no tranga vaovao voatily.
m.L
