Miisa valo izy ireo olona voalaza fa voarohirohy tamin’ilay vono olona feno habibiana nitranga tetsy amin’ny lalan’Imerinkasinina, Ambohimalaza, tokony ho roatokom-bolana lasa izay. Ny dimy tamin’ireo no efa voasambotra ary mbola karohina fatratra kosa ny telo, araka ny fampitam-baovaon’ny zandary. Ny zoma lasa teo moa izy ireo no natolotra teny anivon’ny Fampanoavana ary ny telo nadoboka am-ponja avy eny Tsiafahy, raha nalefa eny Antanimora kosa ny ambiny. Marihana fa misy vehivavy amin’ireto olona ireto, izay tsy iza fa ny ati-doha nikotrika ilay halatra fiara, niharo vono olona.
Niara-nahatadidy tokoa ny rehetra mahakasika ilay olona hita faty voatetitetika tetsy amin’ny lalan’Imerinkasina, ny roa herinandro mahery teo izay. Raim-pianakaviana avy etsy Alasora izy ireo, mpamily no sady mpanera fiara. Tsy hita sy niverina tao an-tranony intsony rehefa nandeha nanao « essai » fiara « sprinter » iray nisy nividy. Rehefa nandeha ny famotorana dia fantatra fa halatra fiara no fototr’ilay vono olona. Ary ny tena mampihoro-koditra dia efa nomanin’ilay mpangalatra mihitsy ny tetika rehetra ahazoana an’io fiara io, eny fa na dia ho tonga hatrany amin’ny famonoana aza. Notambazana vola avokoa mantsy ireo « mpiara-miasa » aminy, ny mpamily hasolo ilay hovonoina, ny « mecanicien », ny mpamono sy ny ireo hafa. Eny fa na hatramin’ity mpamily no sady mpanera novonoin’izy ireo ity aza, hoy hatrany ny fampitam-baovaon’ny zandary dia mbola nokaramainy iray hetsy ariary, mba hitondra ilay fiara hanao io « essai » io. Indrisy anefa fa teny dia novonoina sy notetetitehana ity rangahy ity.
Nandray an-tanana ity raharaha ity avy hatrany moa ny sampandraharahan’ny zandary misahana ny fikarohana heloka bevava ary tsy ela dia io nipoitra ny marina. Hita ny atidoha sy ny sasantsany amin’ireo mpiray tsikombakomba aminy. Efa hita ihany koa ilay fiara, izay efa teo an-dalam-panovàna azy tanteraka ireo tsy mataho-tody. Mbola mitohy kosa ny fikarohana ireo olona hafa, raha ny vaovao hatrany.
m.L
