Raha araka ny fampitam-baovaon’ny zandary dia omaly no naterina teny amin’ny banky foibe ireo volamena izay sarona tamin’ny karàna vavy roa saika hanondrana an-tsokosoko an’izany any amin’ny nosy Maurice. Niara-nanao sonia ny fitànana an-tsoratra ny sampandraharaham-panjakana rehetra izay miasa amin’ny fiarovana ny seranam-piaramanidina : ladoany, zandary, polisy. Izay rahateo ny fepetra takiana rehefa misy ny fanagiazana harem-pirenena izay saika haondrana an-tsokosoko toa ireny. Momba iny raharaha izay niteraka resa-be iny dia mbola fanontaniana mipetraka hatrany ny amin’ny tsy nahitàn’ny fitaovana fitsikilovana ireo volamena tany anaty « faritra arovana » an’ireo vehivavy. Betsaka ny mikaikaika fa mafy loatra ny fisavàna eo Ivato ary betsaka ihany koa ny mitaraina fa be loatra koa ny « manotra », indrindra rehefa tonga avy any an-dafy ny mpandeha. Izao anefa toa mivoaka mora fotsiny eo amin’ny fitiliana sy ny fisavana ara-batana rehetra ny volamena. Raha tsy ny zandary efa tany amin’ny araben’ny fiaramanidina tsy nahatsikaritra ny fanondranana saika hatao.
D.R
