Fampitandremana farany, hoy ny zandary omaly tamin’ny tambajotran-tserasera. Izany dia niantefa tamin’ny rangahy iray; izay mpiantsehatra ary manakiana mafy ny zava-misy ankehitriny. Notononin’ny zandary hatramin’ny andinin-dalàna izay azo anenjehana ara-pitsarana ilay olona aza raha toa ka mbola manohy manao ny ataony io farany. Isan’izany ny lalàna 2016-031 izay mifehy ny heloka atao amin’ny tranonkala, indrindra ny fanalam-baraka. Eo koa ny lalàna 2016-029 izay mifehy ny serasera mahakasika ny haino aman-jery ary ao amin’ny andininy izay mahakasika ny fampitana vaovao tsy marina sy fandranitana fankahalana olona. Mbola nampiana koa farany ny fehezan-dalàna famaizana ao amin’ny andininy faha-91 izay mahakasika ny fikasan-dratsy ho an’ny filoham-pirenena na ny governemanta. Midika izany fa karazan-dalàna telo no indray ampiasain’ny sampana misahana ny heloka atao amin’ny tranonkala eto amintsika. Ny hany fanontaniana mipetraka amin’ny maro, dia ny hoe inona no idiran’ny 2016-029 na ny lalàna mifehy ny serasera an-gazety amin’ny cybercriminalité ? Sa efa azo tsinjaraina ho gazety na haino aman-jery koa izany ny facebook ary ny mpiantsehatra amin’izy ireny izany dia raisina ho toy ny mpanao gazety ? Mila jeren’ny tompon’andraikitra tsara ny famehezana ireo lalàna roa samihafa; izay sehatra roa samihafa tanteraka no tokony hampiasaina azy.
D.R
