Noho ny tsy fandraisana andraikitra ataon’ny fitondram-panjakana dia mitaraina vokatry ny fahatapahan’ny lalam-pirenena 8 C, mampitohy an’i Bemokotrà sy Mahazomà nanomboka tamin’iny herinandro iny. Ao amin’ny toerana iray antsoina hoe » Betaikilotra, 8km miala ny kaominina ambanivohitra Bemokotrà, ato anatin’ny disitrikan’i Maevatanàna, no misy io fahatapahana io vokatry ny ranobe noho ny rotsakorana tamin’ny fandalovan’ny rivodoza » Eloise » farany teo. Voatery tsy miasa ireo fiara mpitatitra olona sy ny kamiao mitondra vato barababingo vokatr’izany. Ny môtô no manatanteraka ny asa fitateram-bahoaka amin’ny sarany dimy alina ariaray ny olona iray. Tsy maintsy miandry ny faharitan’ny rano raha avy ny orana vao afaka miampita ny kodiaran-droa. » Efa nanambara ny hanamboatra ity lalam-pitateram-bahoaka ity ny mpitondra nifandimby saingy tsy hita izay fandraisana andraikitr’izy ireo. Mijaly noho ny fampanantenana poakaty ataon’izy ireo ny vahoaka, hoy ny mpamily fiara any an-toerana. Isan’ny olana iray goavana amin’ny fahasimban’ny fotodrafitrasa tahaka itony ny tsy fahampian’ny fikarakarana sy ny fanaraha-maso ataon’ny tompon’andraikitra isan-tsokajiny. Ahiana ho tanàna haolo ny any Mahazomà raha tsy tafaverina ny fifamoivoizana ambony tanety, satria metsy tsy hisy mpitsidika intsony izany.
Ratantely
