Lehilahy iray efa malaza ratsy amin’ny fanakorontanana sy totankely eny amin’ny faritra Andralanitra sy ny manodidina iny no tra-tehaky ny Polisim-pirenena niaraka tamin’ny rongony sy toaka gasy ny alarobia faha 31 martsa 2021 teo. Ny marainan’io alarobia io dia nanao fisafoana teny an-toerana ireo Polisin’ny FIP miasa ao amin’ny paositry ny Polisy Akamasoa. Nandritrra izany no nahitan’izy ireo lehilahy iray nampiahiahy. Nosakanana avy hatrany ity farany ary rehefa nosavaina dia nahatratrarana fonosan-drongony miisa efatra sy toaka gasy 1 litatra teny aminy. Nosamborina avy hatrany izy ary nogiazana ireo zavamahadomelina ireo ary nentina teny amin’ny « Poste de Police Akamasoa » izy nofotorana. Nandritra ny fanadihadiana no nahalalana fa efa nampitaraina ny mpiara-monina eny an-toerana ny fihetsika sy ny totakely ataon’ity lehilahy voasambotra ity.
T.M.
