Jiolahy iray nangalatra fiara tsy mataho-dalana miloko fotsy mitondra ny laharana 1048 . . . no voasambotry ny mpitandro filaminana, afak’omaly alina, tany Toliara. Raha ny fanazavana azo dia tra-tehaky teo amin’ny barazin’ny zandary tamin’ iny lalam-pirenena fahafito iny ity fiaran’ny teratany karana very nisy nangalatra ny 19 oktobra lasa teo ity, ary saika hoentina hamidy tany Ilakaka ity fiara 4×4 raitra ity izao sarona izao. Mitohy kosa, hoy ny mpitandro filaminana mandray an-tanana ny fanadihadiana, ny fikarohana an’ilay olona nikasa hividy ity fiara halatra. Raha tsiahivina dia nijanona nanoloana banky iray tao Bazaribe Toliara ity fiara tsy mataho-dalana nentina teratany vahiny ity, izay efa narahin’ ilay olona nangalatra maso. Rehefa nivoaka nitelefaonina tany ivelan’ny fiara ilay tompony, dia niditra an-keriny tao anaty fiara ilay mpangalatra ary nentiny nitsoaka nirifatra ilay 4×4 avy eo. “ Sambany no nisy trangana halatra fiara toy izao teto Toliara hatramin’ny fiandohan’ ity taona ity ”, hoy ny kaomandin’ny kaompanian’ny Zandariamaria ao Toliara, nitafa tamin’ny mpanao gazety.
Eric Manitrisa
