Olona iray namoy ny ainy, dimy hafa kosa naratra mafy. Vola mitentina eo amin’ny 12 tapitrisa ariary teo kosa lasa. Ireo rehetra ireo no vokatry ny fanafihan-jiolahy nitranga tao amin’ny fokontanin’i Vohenana, kaominina Soavina, any amin’ny distrika Ambatofinandrahana, ny faran’ny herinandro lasa teo. Araka ny fampitam-baovao avy amin’ny zandary any an-toerana dia trano telo samihafa, izay samy mpividy vatosoa, ireto lasibatry ny asan-jiolahy ireto. Jiolahy manodidina ny 20 lahy mirongo basim-borona no tonga nampihorohoro ny tanàna tamin’io fotoana io, tokony ho tamin’ny 10 ora alina tany ho any. Tsy nisy tao an-tanàna ny vatan-dehilahy tamin’io andro io, hany ka tena nanararaotra ireto malaso ireto. Saika ankizy sy vehivavy avokoa no tratran’izy tao an-tanàna. Na izany aza anefa, tsy nisalasala mihitsy ireto olon-dratsy nanampatra herisetra tamin’izy ireo. Raha ny tatitra azo hatrany dia nisy ny voadaroka vodibasy, tao ny voafira antsy. Adiny iray mahery taty aorian’ny fanafihana no tonga tany an-toerana ny zandary saingy efa tafaporitsaka avokoa ireo olon-dratsy. Efa nentina namonjy toeram-pitsaboana avokoa ireo naratra. Mitohy kosa etsy andanin’izay ny fanadihadiana ataon’ireo mpitandro filaminana.
m.L