Fifandonana nahery vaika no niseho tao amin’ny fokontany Tsinjorano ao amin’ny kaominina Makaraingo ao amin’ny distrikan’Ambatomainty, any amin’iny faritra Melaky iny, teo amin’ireo mpanara-dia sy ireo andian-dahalo, ny andron’ny Paka teo. Vokany, zandary mpiana-draharaha iray no namoy ny ainy, niaraka tamina olona iray isan’ireo mpanara-dia. Nisy dahalo roa ihany koa maty tsy afa-manohy ny asa ratsiny, saingy, araka ny fampitam-baovao azonay dia nobatain’ireo namany nentiny nandositra ireo razana ireo. Raha ny zava-nitranga dia nitrangana fanafihan-dahalo tao amin’ny tanana iray tao Ambonarabe, ny alin’ny sabotsy hifoha alahady lasa teo. Nahatratra tany amin’iny 30 lahy tany ho any ireto malaso ireto, ary nirongo fitaovam-piadiana. Omby niisa teo amin’ny 500 teo no lasan’izy ireo tamin’izany. Vao avy nanafika anefa ireto farany dia nifamory ny fokonolona ary niroso tamin’ny fanarahan-dia, nampian’ireo zandary tany an-toerana. Teo amin’izany fokontany Tsinjorano izany no nifankatratra ireo mpanafika sy ny mpanara-dia ka velona teo ny fifandonana. « Olona roa tamin’ireo mpanara-dia no lavo ka isan’izany ny “gendarme stagiaire » miasa ao amin’ny PA Marotsialeha. Tafatsoaka indray hatreo ireo dahalo niaraka tamin’ny omby rehetra rehefa mbola niezaka tamin’ny famonjena ny ain’ireo olona roa voatifitra ny mpanara-dia ” hoy ny vaovao. Tsy nijanona hatreo anefa fa nifandamina ireo mpanara-dia ka nisy ireo nitondra ny razana niverina ary nisy ireo mbola nanohy hatrany. Efa niomana tamin’ny fanakanana ny lalan’ireo olon-dratsy koa anefa tetsy andanin’izay ny zandary sasany tamina tobim-paritra manodidina. Ny alahady antoandro dia tratra indray ireo malaso ka nisy ny fifandonana. Tamin’ity indray mitoraka ity anefa dia nisy roa tamin’ireo olon-dratsy no lavo ary nisy telo hafa naratra. Vaky nandositra araka izany izy ireo namela ireo omby teo, izay efa naverina tamin’ny tompony, araka ny tatitra azo hatrany.
m.L