Toa saika ahitana olona voafonja mbola misazy avokoa ireo jiolahy sarona amin’ny fanafihana mitam-piadiana teo Ambatondrazaka amin’izao fotoana izao. Voalaza mihitsy aza fa misy mandray anjara amin’ny fanafihana ireo mpiandry fonja .Namoaka ny marina rehetra tamin’ny mpanao gazety ny mpisolovava sy ny fianakavian’ireo olona nisy namono tao Andrarabary ny faha-09 janoary 2019 teo .Araka ny fanazavana dia nanomboka tany amin’ny fanafihana vato sarobidy tany Brieville izay nahitana jiolahy manao fanamiana mpitandro ny filaminana. Gadra mbola misazy sy mpiandry fonja no nanao ny fanafihana. Mbola misazy ireo olona ireo raha ny nahafantarana ny marina rehetra. Teo ihany koa ny halatra goavana teto Ambatondrazaka tamin’ny taona 2017 izay nahitana voafonja , ary ny farany teo dia ny fanafihana tao Andrarabary izay nitetehana sy namonoana ireo mpivady notafihana saingy tsy maty. Rehefa nataon’ny polisy ny fanadihadiana dia toa olona mbola mamita sazy ao amin’ny fonjan’Ambatondrazaka ny sasany. Rehefa manao ny famotorana ny mpitandro ny filaminana ka manatona ny fonja dia olona voafonja nilefa no voalazan’ireo mpiandry fonja .Manao antso amin’ny fanjakana foibe ny mpisolovavan’ireto fianakaviana, Atoa Maitre Njakarija sy ny solontenan’ny fianakaviana, Atoa Didier Luc, mba tokony hijery akaiky ny voafonja ao amin’ny fonjan’Ambatondrazaka fa misy ny tsikombakomba ao. Ho zava-poana ny ezaka ataon’ny mpitandro ny filaminana raha izao no mitohy satria mifampiaro ireo mpiandry fonja rehefa misy ny fahatratrarana ny namany, ka tokony hofoanana ny fampiasana gadra amin’ireo mpiandry fonja. Niezaka nanatona ny tompon’Andraikitry ny fonja ny mpanao gazety saingy mbola tsy nahazo valiny . Io no fanazavan’ireto fianakaviana nisy namono tao Andrarabary miaraka amin’ny mpisolovava raha namory mpanao gazety izy ireo ny faha-01 febroary 2019 lasa teo. Raha tsy misy ny fandraisana andraikitra, hoy ny fanazavana, dia mety hiverina indray ny fitsaram-bahoaka, satria lasa tsy maty manota ireo mpiandry fonja sy ny voafonja amin’izao kiantranoantrano miseho izao.
Janus R