Tsy nihanona fotsiny tamin’ny fahavotsoran’ilay Rtoa antsoina hoe “ Lalaina” ; izay nalain’ny jiolahy 15 an-keriny tany Ambodimanga-Betsiboka ny mpitandro ny filaminana aty an-toerana, fa niroso hatrany tamin’ny fanadihadiana hikarohana ireo olon-dratsy. Araka ny fanazavana azo avy tamin’ny Zandary hatrany, dia olona fito niampy mpimasy hatreto no voasambotra, raha ilay raharaha fakana an-keriny tao Ambodimanga-Betsiboka. Araka ny fampitam-baovao hatrany, dia mpiray tambajotra amin’ireo mpaka an-keriny ireto voasambotra ireto, fa tsy mbola ireo nandray anjara nivantana akory. Araka ny loharanom-baovao hatrany, dia mpanome fanafody ampiasain’ny dahalo sy mpanafina an’ilay Rtoa notànana an-keriny ireto olona ireto. Misy amin’izy ireo ihany koa ireo irakiraka, mpandeha mividy zavatra tany an-tanàna toy ny fahana amin’ny finday niantsoan’izy ireo amin’ilay fitakiana vola. Etsy an-danin’izay kosa dia fantatra fa salama vatana sy saina ary efa mahavita mandehandeha tsara eto an-tampon-tananan’i Maevatanàna kosa Rtoa Lalaina, izay vao votsotra andro maromaro lasa izay. Efa eo am-pelantanan’ny Zandary ao amin’ny GAPJ na “ Groupe D’ Appuis à la Police Judiciaire Maevatanàna” ny raharaha, ary mbola atao famotorana izy fito ireo, izay hatolotra ny fampanoavana tsy ho ela. Etsy an-danin’izay kosa, dia mbola eo am-pikarohana ireo jiolahy anisan’ny nandray anjara nivantana ny Zandary amin’izao fotoana izao.
Ratantely