Notontosaina ny herinandro lasa teo, ny 02 ka hatramin’ny 04 desambra, tao amin’ny renivohitry ny faritra Analanjirofo, ny andiany faharoa tamin’ny Festival Tolo-pandragna. Hetsika ara-kolontsaina, fa indrindra ara-ekônômika ho enti-mampahafantatra ny vokatra ara-toe-karena mampalaza ny faritra Analanjirofo sy ny ao Fenoarivo Atsinanana. <<Tolo-pandragna aigniny velon-tegna>> io no teny filamatra tamin’ity andiany faharoa ity. Marihana fa nahasarika olona maro, na ny teo an-toerana na ny ivelan’ny faritra izany hetsika izany. Tranoheva maromaro, izay nahitana ireo vokatra tany an-toerana no nampirantiana nandritra ity telo andro ity. Koa satria hetsika heverina fa hitondra aina vaovao ho an’ny fampandrosoana ny faritra izany Tolo-pandragna izany, dia tonga nanome voninahitra ny fanokafana azy tamin’ny fomba ofisialy, ny mpitarika ny fampandrosoana any an-toerana, ny Goverinoran’ny faritra Dr Randriamantena Marcellin. Tsy nanadino velively ny faritra niaviany ihany koa tamin’izany ny Jly Serge Gellé, Sekreteram-panjakana miadidy ny zandary, no sady ministra mpiahy iny faritra Analanjirofo iny, izay tonga nanotrona izany fanokafana ny festival Tolo-pandragna izany. Teo ihany koa ireo olo-manankaja maro, vato nasondrotry ny tany avy any amin’iny faritra iny. « Ho lava velona ny Festival Tolo-pandragna hoy ny Governoran’ny Faritra Analanjirofo ary hanohana hatrany ny Faritra amin’izay tandrify azy » hoy ny fanazavana azo.
m.L
